هذي كربله جينه ووصلناها ...ووصلنه كل مصارع أهلي شفناها
بسما وصل بينه الحادي لرض الطف تذكرنه الجسوم السالت ادماها
و انـعـادت عـلينه امصيبه الوليان يوم الهوت علغبره و فكَدناها
و ذكرنه الأكبر اللي طاح علغبره و سيف الصوبه و لدمومه أجراها
و ذكـرنـه جـاسم العريس و الزفه و جفوفه بمسيل ادماه حناها
و بـهـذا المكان انذبح عبد الله و ركَبته بسهم غادر حرمله ارماها
و هاي المشرعه و مصرع كَمر هاشم و ذكرنه السهم لمن عينه طفاها
هذي كربله و مصرع أبو السجاد و كَطعت منحره الدامي ذكرناها
و بـهـذا الـمكان انهشم صدر احسين و بهذا الكتر جثته الكَيناها
و اهـنـا هـجمت الخياله عللأيتام و نار الخيم محد إجه و طفاها
مـا ننسه المصيبه اللي جرت بالطف أهلنه اتذبحت و اشلون ننساها |
