أضف الموضوع
الشاعر واثق العيساوي - 14/10/2015م - 1:34 ص | عدد القراء: 2679
مو غريبه...ايكرر التاريخ نفسه مو غريبه
من مصيبه...يخلص المظلوم و يطيح ابمصيبه
و اليدافع عالقيم...لون شفناه انظلم
مو غريبه...مو غريبه
اقره تاريخ الظلامات القديمه
شوف شنهي أفعال أرباب الجريمه
من ظليمه انروح و انرد الظليمه
صاحب الحق صاحب الباطل غريمه
و الشواهد...بين دم حسين و الحمزه شواهد
دم مجاهد...ضحه لجل الدين عمره دم مجاهد
و من يوصفهم قلم...لون شفناه انظلم
و اليدافع عالقيم...لون شفناه انظلم
مو غريبه...مو غريبه
حمزه ناصر للنبي ابعهد الرساله
و الحسين ابدمه هالدين اكتماله
جبد حمزه اتمزق ابخنجر ضلاله
و جبد الحسين العطش خنجر صفاله
روحه روحه...كلمن الأجل العقيده ضحه روحه
و دم جروحه...شيّد الدين و عله من دم جروحه
كلمن ايشوف الألم...لون شفناه انظلم
و اليدافع عالقيم...لون شفناه انظلم
مو غريبه...مو غريبه
حمزه غدروه و نعم عنده ظلامه
لجن خيل اعداه ما هشّمت اعظامه
لا سبو اخته و لا حرقوا اخيامه
ما خذوا راسه و لا داسوا أيتامه
بيده بيده...النبي للحمزه هل اترابه بيده
بس وحيده...جثة حسين البقت و الله وحيده
صدره مصيوب ابسهم...لون شفناه انظلم
و اليدافع عالقيم...لون شفناه انظلم
مو غريبه...مو غريبه
وحشي جاب ابخنجره لوعه و أذيه
لجن مثل الشمر بالغاضريه
من صعد صدر الحسين ابلا حميه
قطع راسه و وشوفه البنته رقيه
يا رقيه...هذا نحر حسين ينزف يا رقيه
سبيه...انتي وي عمتج أريدنج سبيه
يشتم و ركب الحرم...لون شفناه انظلم
و اليدافع عالقيم...لون شفناه انظلم
مو غريبه...مو غريبه
درع حمزه بالحرب حط اعله صدره
حسين طالع بالرضيع القلبه جمره
طلب منهم ماي لابنه و لو قطره
بس رجع لامه و سهم مصيوب نحره
دّمه دّمه...جان بيد حسين يجري دمه دمه
ظلمه ظلمه...صارت الدنيه بمصابه ظلمه ظلمه
من عذب ماي انحرم...لون شفناه انظلم
و اليدافع عالقيم...لون شفناه انظلم
مو غريبه...مو غريبه |
|
