نار الرزية...مستعرة بية
قبل المخيم...هاي المسية

نار القلب جوتني و حرت بأمرها...قبل الخيم يخويه يسعر جمرها
و اللي احرقوا قلبها تالي عمرها...تسهل عليها خوية حرقة خدرها
من هالمسه و غاد...أمشي اعله الرماد
و تبدي الأذية...هاي المسية

مشتاقة هالمسية أشتم الأثنين...جف حامي الضعينه و نحرك يالحسين
هالليلة ناري تسعر و أصفج بالأيدين...منتظرة جيت أمي ما تغفه لي عين
منتظرة أمي...تتعنه يمي
و تصبر عليه...هاي المسية

يبن أمي هالمسية مو من عمرنه...الليلة قمر يخوية ناقص خدرنه
نادي اعله غيرة الله بجوده يمرنه...خل يضوي بسمانه الليلة قمرنه
و باجر أشوفه...ايغيب ابخسوفه
و أهوه المنية...هاي المسية

يا بو الكفالة دونك ما تحله دنياي...يالنظرتك روتني ما ريدن الماي
لو قطعوا جفوفه ما سامح إعداي...و عينك إذا رموها شيرجعك اوياي
اجفوفك يعباس...تنضح عطر ياس
خلهن بيدية...هاي المسية

أكثر أريد أشوفن طولك و أكابر...يحسين أفقدك أدري عني تغادر
جدامي يمشي راسك يا خويه باجر...و كل وصله من ضلوعك ياخذها حافر
لو داسوا أعضاك...وين أقدر ألقاك
هالحسرة بية...هاي المسية