هاي الخدامة...ثوب الشرف يوليدي
تاج الكرامة...و صك الشفاعة بيدي
بالدنيه بالك تنغر...إلزم يبويه المنبر
تاج الكرامة...تاج الكرامة

بهاي الخدامة يبوية أوصيك إلتزم...و إخذ الهوية الشريفة الحوت أشرف اسم
وي منبر حسين إلتزم لا تخلف الراي...و الوردة ما تشتم هوه لو عافت الماي
و آنا المشيت الجنته قوم امشي وياي
منبر أميري...هوه هويتي و دخري
باقي بمسيري...الآخر نفس من عمري
بالك تعوفه تخسر...إلزم يبويه المنبر
تاج الكرامة...تاج الكرامة

يا بوية صدق أوعدك أسير بخطوتك...منبر خدمتك ألزمه و أفرح مهجتك
جفني فتحته بمنبرك يا خادم حسين...لازم عله المنبر أظل الحد طبقت العين
و انصحني يا بوية ردت عن خبرة اسنين
ردت النصيحة...يا من خلصت بحبك
خطوة صحيحة...حته أسير بدربك
يالكلمتك تتكرر...إلزم يبويه المنبر
تاج الكرامة...تاج الكرامة

يوليدي أول نصيحة تصّفي نيتك...يبني سلوكك هويتك لسيرة خدمتك
صوتك حلو لازم بعد أخلاقك أحله...لا تعله عالوادم لأن بس ربك أعله
و لا تبتعد عن منبرك ما تلقه مثله
خدمة إمامك...بالك تفرض بيها
رفعت مقامك...لازم تموت اعليها
من التكّبر إحذر...إلزم يبويه المنبر
تاج الكرامة...تاج الكرامة

هاي النصيحة يبوية إلي أعظم درس...منهج حياتي و طريقي المثل ضوء الشمس
هاي النصيحة بمنهجي أقراها قرآن...خدمة إمامي و منبره سوتني إنسان
ما عندي عنوان و صرت بالخدمة عنوان
صارت هويتي...خدمة شهيد العترة
كاتب وصيتي...نعشي يطوف الحضرة
قلت لي الخدم تتعطر...إلزم يبويه المنبر
تاج الكرامة...تاج الكرامة

يوليدي أدعي يوفقك إلهي بهالدرب...يا بوية انت دعائك شفت راحة قلب
خليني أبوسن يمنتك يا شمعة البيت...يا بوية نعم التربية منك تربيت
أحيا و أموت بمنهجك يالبيه تغذيت
يوليدي أريدك...بقرايتك تسعدني
يا بوية بيدك...عالمنبر اتصّعدني
بيدي أصعدك و أفخر...إلزم يبويه المنبر
تاج الكرامة...تاج الكرامة