يا حسين..الله لا يبعدني عنك...يا حسين..هذا كل العندي منك
ما أجامل لو قلت لك...روحي بيدك سلمتها
الله لا يبعدني عن شوفة قبابك...و لا يخليني أدقن غير بابك
كون اموتن موتتك و أحمل عذابك...و أشترك وي زينب بلوعة مصابك
يا شهيد..كون أظل آنا بخدمتك...يا شهيد..بلكي تشملني برحمتك
يالمحبتك قدستها...روحي بيدي سلمتها
هذا كل العندي من فضلة عطاءك..و انكشف حالي و تغطيت برداءك
الله رازقني بظل طاعة ولاءك..طامع بعفوك و أنا بواحة وفاءك
يالحبيب..و أدري بجفوفي من أمدها...يالحبيب..خالية أبدا ما تردها
تخلص الحاجة الردتها...روحي بيدك سلمتها
آنا ما عندي أبد حب ثاني غيرك...كلها أسره بغير حب و آنا أسيرك
تدري حبيتك لأن ما كو نظيرك...شاف يا مولاي ما شفته بمصيرك
يا صبور..ما كو مثلك بشر صابر...يا صبور من بقيت بغير ناصر
و المآسي اتحملتها...روحي بيدك سلمتها
ربي رازقني بمحبتك من محبتي...و بخدمتي اوياك حسدوني بخدمتي
من يصيح إسمك بشر تنزل دمعتي...و اختنق يحسين مولاي بحسرتي
يا إمام..و أذكر أيام المصيبه...يا إمام..و قصة الجثة السليبة
و اليتامه اللي عفتها...روحي بيدك سلمتها
كون عمري ايطول من أجل الخدامه...و ألف هنياله القضه بخدمة إمامه
بكثر ما أشوف الدمع عالخد علامه...بصحنك الزوار جن كلهم يتامه
يا غريب..كل غريب أحضر غربته...يا غريب..و اليتيم أمسح دمعته
تبجي زوارك شفتها...روحي بيدك سلمتها
ربي لا تحرمني من هاي الشعائر...و سجل إسمي بدفترك يا بن مظاهر
عمري خلصته لطم بين المنابر...و ليلي كل أحزان ليلة يوم عاشور
يا ذبيح..ما نمت ليلي و نسيتك...يا ذبيح..ابدمع عيني اتذكريتك
تبجي لجلك علمتها...روحي بيدك سلمتها
ربي لا تحرمني من فضل الزيارة...و الإمام الطال بالناس إنتظاره
يا إلهي بجاه الأنصار الغياره...سجل إسمي اويه الترد لحسين ثاره
يا خضيب..لمن ايسألوك عني...يا خضيب..لا تدير الوجه عني
اسنين خادم خلصتها...روحي بيدك سلمتها
