بالوغه الرايه اتريد راعيها
من يزمها ويصول --- كلمن ايشوفها يـﮕول --- راعيها
.......................
عادة ألأشراف تنطي --- الرايه للماجد ألأروع
لو تقدّم بيها يوصل --- غايته ولاعنها يرجع
أعز من روحه الرايه --- ودونها ابنفسه إيتبرّع
ومن تحمه ساعات الحرب
يبتـــسم لأنــغام الضــرب
للحومه بيها من يطب --- جيش عدوانه ايتضعضع
للمراجل تحديد ينطيها
مايردّه كل هول --- مجده للزُهره ينول --- راعيها
.......................

هالذي الهادي محمد --- اختار للرايه الصميده
الكامل ابكل المعاني --- علي وســــلّمها ابيده
وأبو حسين إلتزم بيها --- اوصانها ساعة الشده
كلـما هـجم بـيـها فتـــح
ازناد المعارك لو حدح
ولوطغه المكيال اوطفح --- ما سوى حيدر يردّه
حيدر ابثـﮕل الويد يلفيها
يترك الجيش فلول --- حيدرمن يجول --- راعيها
........................
وهذي الرايه الشريفه --- الواضحه وعندك علمها
ابكربله الحسين أمرها --- انشوفه إلمن يسلمها
اتخيّر إلها من أخوته --- شهم بالحومه يزمها
عبــاس ياحي هالأســـم
همه أوفه صوله وعزم
هالبطل إلها يســـــتلم --- كل كلوفه يستلمها
شهم صامد صنديد يحميها
الراسيه ابعزمه تزول --- والحرب خلها إطوّل --- راعيها
.................
زم ابو غاضل الرايه --- وما سوى هالرايه إلها
خوّته ويه حسين خوّه --- علـي وأحـمد تمثلها
صال يوم الكون بيها --- وكل جيوش الشر ذهلها
وعباس عدهم بي علم
ما توگف ابوجها الزلم
ذب الحزم فوگ الحزم --- وكل فصايلها وكُتلها
خل يزود التحشيد يفنيها
بالرهيف المسلول --- دمها يجريه إسيول --- راعيها
.................
سيطر إعليها ابسيفه --- وصدى المرهف يهددها
ضيّـﮕت منه الوسيعه --- والدروب اعليها سدها
سادت الفوضى العسكر --- والنظام إنفـﮕد عدها
والقائد إبعمره شرد
منهو الينضمها بعد
افواج ماإلها عدد --- كلها شتتها اومردها
يـﮕصد ارجال الصيد يدعيها
بين شارد مذهول --- ولاّثابت مكتول --- راعيها
....................
الذعر عالجيش خيّم --- والفكر من قادته انشل
تاهت ابذيـچ المعاره --- وبعد ماتعرف إشتعمل
والذي منهم إمصيّت --- شرد من اخياله واختل
اليا كتر حارت تنهزم
واحد ابواحد يصطدم
الموت حل بيها الزلم --- وما بعد للدرب تندل
بالدمه ذيـچ البيد يسـﮕيها
دعه العسكر مذهول --- وبضلام المجهول --- راعيها
......................
آه ياوسفه المـﮕدّر --- گطع يمناه اويساره
والسهم صوب العين --- ودمّه من راسه يتجاره
السلام اعليك ناده --- ياشبل حماي جاره
ياخويه وافاني الأجل
إسرع يبن خير العمل
والهوه الهل صيحه حمل
ساعد حسين ويعز صبره لجل افداك أخيذه
................