أدور اعليك يبن امي........... ولا واحد يدليني
عاد انته ابضعيف الصوت ... يا مظلوم حاجيني
---------------------------------------------
جيتك من كَلب مكسور...آنه اختك المهظومه
جيت بروح لهفانه....ادور اعليك بالحومه
جيتك خويه حاجيني... عليك امك المظلومه
وين بيا كتر مطروح؟
جسمك هم بعد بي روح؟
يبن امي صدكَـ مذبوح؟
وين الينغر لحالي ... ويم جسمك يوديني
----------------------------------------
صدكَـ نايم على التربان؟ .. خويه وعالوجه مكَلوب؟
صدكَـ سحكَت عليك الخيل؟ .. بالميدان من كل صوب؟
صدكَـ خويه نزف دمك؟ .. وكَلبك بالسهم مصيوب؟
ولمّن يا صبي العين
طلعت السّهم يحسين
من كَلبك طلع ثلثين
وهذا السّهم هوَّ الحال ... ما بينك وما بيني
-------------------------------------------------
حر او عطش وبجسمك... الف وتسمعمية اصواب
فوكَـ اجروحك ودمك..... كَلبك بالسهم ينصاب
بعد شلون تتمكن........... تنهضلي او ترد اجواب
وادري يا ضوه عيناي
لو ما هالمصايب هاي
متقصر يخوي وياي
وحاشاك بمثل هاليوم .... محتاره تخليني
-----------------------------------------------
حالك هذا وانت النوب.. خويه اسمع بعد حالي
بأيتام او حرم كَلبي..... اتمحن وانشده بالي
وين انطي الوجه وآنه... اخوتي امذبحه اكَبالي
وكلسا طفل من عندي
يروح وينفطر جبدي
وآنه ابكربلا لوحدي
صواويني خذتهه النار... والعيله وصواويني
-------------------------------------------
هجمت فرد هجمه الخيل... خويه او شبّت النيران
او هامت عيلتك كلهه... امن النيران للميدان
لجن يا ضوه اعيوني... ضلّت بالخيم رضعان
وآنه اتمحنت بيهه
اشلون النار اطب ليهه
واخلصهه يواليهه
رضعانك ابوسط النار... وآنه العده امسلبيني
-------------------------------------------
خويه امحيره ضليت... واتلفت يمين ايسار
اعوف الخيم رضعانك.. تتحركَـ ازغار اكبار
اطب للنار اخلصهه.. اخاف آنه احتركَـ بالنار
والايتام ملتمه
هاي اتصيح يا عمه
وين حسين ابو اليمه
وهاي تصيح يا زينب .... حر العطش ماذيني
----------------------------------------------
رضعان ابوسط نيران .... وايتام ابحوافر خيل
ماتت بالسحكَـ وعيال... هامت والدموع اتسيل
وآنه وحيده مظلومه... وبيه بعد ما ضل حيل
وعباس الاجيت وياه
هسا من كَمت انخاه
اضن كَلّي يزينب آه
عليج اشبيدي يعيوني... يزينب وين جفيني؟
--------------------------------------------
خذاك الدهر من عندي... يخويه وكَطعت بيه
مصايب كربله يحسين.. مدري امنين اجت ليه؟
من الخدر والصيوان.. تاليهه البني امـــــــــــــــيه
هجّي الدهر خلاني
ظيم وهظم راواني
صرت من عكَب ولياني
ارد السوط بيساري.... واستر وجهي بيميني
-------------------------------------------
ها شتكَول يبن امي.... ردلي ابصوتك جوابي
تقبل بعد اشكيلك... هظمي او جمرة امصابي؟
انته بالسهم مصيوب... وآنه افراكَك اصوابي
انته جروحك بجسمك
وآنه امجرحه ابهظمك
يخويه خل اجي يمك
اداوي جسمك بروحي.... وبشوفتك داويني
-----------------------------------------
يخويه ان جان ماعندك... همّه اتكَوم لعيالك
لا تهتم يماي العين........ آنه اخلافك ابدالك
احامي عيلتك آنه........ يخويه واحرس اطفالك
لجن يحسين اخاف اعليك
ضامي ومحد ايرويك
خل اعتني واكَصد ليك
أقدم الك ماي العين ... واشرب يا بعد عيني
---------------------------
