أضف الموضوع
الشاعر السيد سعد الذبحاوي - 27/09/2015م - 3:06 م | عدد القراء: 2186
من علي موقف ثباته...إبدمه خلّد تضحياته هذا مسلم بالوجدان...صوره يرسم بالأذهان
الأمه الأبيه من تشوف القائد واقع نظامه إتنظره واقع فاسد واجب عليه إتعزله ضده إتجاهد و موقفها كون إيصير موقف واحد من نخاطب مجتمعنه...لازم إنصلح وضعنه هذا مسلم بالوجدان...صوره يرسم بالأذهان
نحجي الحقيقه و عالعدل منجامل ليش أكثر الوادم تأيد الباطل و تخذل الحق و ضده توقف حايل و هذا الفعل طول الزمن متواصل العرفت الحق و سبيله...إبكل وكت قله قليله هذا مسلم بالوجدان...صوره يرسم بالأذهان
من عرفت إبن إزياد واضح أمره كتبت لبو اليمه تريد النصره و تالي الطمع غّير هذيج النظره و قامت إويه الناصر تدور الغدره الكوفه مسلم من وصلها...إبنظرته شخّص عللها هذا مسلم بالوجدان...صوره يرسم بالأذهان
موقف تجله إبصورته الوضاحه حين النزل ظنوة عقيل الساحه إبهمة علي محتزم و بوشاحه مثل الصقر لمن صفق بجناحه زلزل الكوفه و فناها...من صرخ بيها فتاها هذا مسلم بالوجدان...صوره يرسم بالأذهان
صورة وفه و بكل ذهن مرسومه جسّدها مسلم من نزل للحومه و الوقف ضده لو نريد إنلومه عن أصله نبحث نسأل قومه كلمن و ذاته و ضميره...لو رضه إبظالم أميره هذا مسلم بالوجدان...صوره يرسم بالأذهان
مصلح إجه و شنو بعد حجتها ضحّه بوجوده من أجل عزتها للذله هيَّ القدمت رقبتها هاي اللي شخص حيدره علتها ذبحته إبمرهف جبنها...و إبتلت تالي إبفتنها هذا مسلم بالوجدان...صوره يرسم بالأذهان |
|